LinkBack URL
About LinkBacks
kitney Armaan...Khwahishe N kitni........ –
Juhu ke bheer bharey ilaqey me kisi jaan pehchan waley ka mil jana ya yun kahuN ke dikh jana namumkin nahi hota hai magar uska mil jana to mujhey namumkin sa hi lagta tha….
Shaam ka waqt aur woh garmiyoN ki shaam….logo N ka ek hujum sa tha jo railey ki shakl me alag alag tafreehat me magan tha….. Kabhi mujhey bhi yahan anaa aur ghantoN baith kar ussey bateN karma bohot pasand tha….
Thakey thakey qadmon se mai yuN hi samandar ke kinarey tehal raha tha aur soch raha tha ke doobta suraj kya kehta hai…..doob jana hi zindigi ki haqeeqat hai ya doob kar phir ubharna?
Ruk kar koney wali dukan se cigarette kharidi aur abhi sulga bhi na paya tha ke nazar us ke chehrey per ja thehri aur lamhey ke hazarweN hissey me mainey usey pehchan liya…
Phir ek pal ganwaye bina mai tez tez chalta uskey nazdeek ja pohocha.
“Sabahat ye tum hi ho na?”
Meri awaz se meri khushi jhalak rahi thi yaqeenan.. woh palti aur phir chand lamho baad dheerey se muskura di
“haN mai hi huN….aur tum bohot badal chukey ho”
“Waqt ke saath to sab hi kuchh badal jata hai….tum bhi to…” mainey ghaur se uskey sabeeh chehrey ko dekha
“mai bhi to kyaa?” usney apni bari bari ankhon ko aur phailaya
“badal gayi ho….pehley se zyada khoobsurat lag rahi ho”
“bas bhi karo Adil….tang kheenchney ki adapt gayio nahi tumhari” uska chehra halka gulabi hua aur mainey apne dil me halki si gudgudi mehsoos ki..Woh aaj bhi waisi hi thi jaisi 10 saal pehley thi….narm o nazuk chameli ki daal jaisi…champayi rangat aur bari bari gehri ankheN….samander se bhi gehri.
Woh meri colleague thi….hum ek hi company me saath kaam kartey they.….naya naya college se nikla tha aur nikaltey hi naukri mil gayi thi….apni kaamyabiyon ke khumar me jeer aha tha….aur jab mohabbat ki khumari chhayi to kuchh hosh na raha…
Sabahat ke sabeeh chehrey me apna mustaqbil talash karney laga….3 saal mainey aur sabahat ne saath hi is safar me guzar diye….gokey koi bhi ehad hua na paimaaN…..na mainey kuchh kaha na usney kabhi puchha….lekin phir bhi hum dono hi jantey they ke hum ek hi naao ke sawar they….
Unhi dino meri ghazlon ko ek naya raasta mil gaya….go likney ka shauq to college ke dino se hi tha magar jhijhak ke sabab kabhi kisi doosrey ko bataya hi nahi ke shayeri bhi karta hun….sabahat ko sunaya to usney meri khoob hi hausla afzayi ki…..aur phir ye mera shughal ban gaya….mai ghazleN likhta aur Sabahat ko sonata aur who dil khol kar tareef kiya karti…..us zamaney me meri sari ghazleN uske sabeeh cherey aur gehri gehri ankhon ke ird gird ghooma kartiN….mujhey kuchh aur nazar na ataa…..bas sabaht aur meri ghazal.
“Aao kahin coffee peetey haiN” mainey offer kiya jisey usney foran qubul kar liya.
Hum saath chaltey qareeb ke coffee shop me aa baithey.
“Kya kar rahey ho aaj kal?” Usney sawal kiya..sawal to mai bhi bhoto se puchhna chahta tha maagr who shaayd mujhse bhi zyada beqarar thi.
“Ek MNC me Administration dekh raha hun….achcha job hai….5 saal se huN isi company ke saath”
“That’s great”Who muskuraayi….ankhon ne phir harkat ki….mujhey yaad ayaa mainey kitni ghazleN uski ankhon per likh dali thin…Mai dil hi dil me un ghazlon ko yaad karney ki koshish karney laga….magar kuchh yaad nahi arha tha….maine jhunjhla kar khud ko ek thappar laganey ki khwahish ko dabaya….
“Tum yahaN kaisey?”Mainey puchha aur dil ki tez raftari ko qabu karney ki koshish karney laga…..kaya malum abhi keh dey tumharey liye…..sirf tumahrey liye….tumhe hi dhoond rahi thi aur dekho tum mil gaye….
“husband ke saath aayi hun….unka tour tha is taraf to mai bhi saath ho li”
Dhar…..dhar….dharam .
Shayad koi imarat giri thi….mainey ghabra kar idhar udhar dekha….shayad andar ki imarat dhey gayi….mainey khud hi apna shana daba kar dharas bandhayi…
Kitni tamanna thi mujhey ke mai sabaht ko dulhan bana kar ghar le jaun….lekin meri sari tamannayeN mere dil ke andar hi reh gayiN…..
Jab ghar me meri shadi ki baat uthi to mainey kitni hi baar himmat ki Amma ko bataun ke unki bahu mai pasand kar chukka hun magar har baar alfaz zaban ka saath deney se inkaar kar detey aur har baar mai hasrat ki tasveer bana baitha reh jata…
Ek din Amman e mujhey ek tasveer pakra di”lo dekh lo tum bhi….mujhey aur tumharey abba ko pasand hai….hum taye kar aye haiN”
“haN bhai larki to waqayi bohot achchi hai….bahu jaisi chahta tha waisi hi mil gayi….karam Allah ka” Abba miyaN araam kursi pe jhultey huye bohot araam se boley.
“Apni biwi bhi khud hi pasand ki aur meri bhi….is bar to mujhey mauqa de detey"
mainey jhalla kar tasveer ko dekha jisme ek khush shakl larki muskura rahi thi….magar mujhye koi dilchaspi nahi thi….woh muskurahat sabahat ki to nahi thi na…..
mainey mahiney bhar baad dartey dartey shadi ka card sabahat ko pakra diya.
“Bohot mubarak ho Adil”
Tawaqqa ke bar asks uski muskurahat mujhey hairan kar gayi.
“I am sorry Sabahat…..” mainey larkharatey lehje ko zara sambhal kar alfaz tarteeb diye magar ussey pehley hi woh bol pari
“Sorry ki kyaa baat hai Adil….2 maah baad to meri bhi shadi hai….shayad yahi darj tha qismat me”
Mainey gehri saans chhori…..aisa laga jaisey kisi bojh se azaadi mil gayi ho…..sharmindigi ka ehsaas jata rah aur mai khush ho gaya…
“Phir to bulaogi shadi me?”
“BulauNgi to magar tum aao gey nahi kyuki shadi yahan se nahi Delhi se hogi”
Who muskuraayi aur mainey uski gehri gehri ankhon ko hasrat se dekha aur socha “ab mai ghazal kiski ankhon per likhunga”
“Tumhari ghazlon ka kyaa bana?”
Sabahat ki awaz mujhye haal me kheench laayi
“kuchh nahi….jab inspiration hi nahi rahi to ghazal kahaN”
“kyun inspiration to ghar me hai na….har pal tumharey saamney” who shararat se muskuraayi
“nahi….meri inspiration to tum hi thin….aur ab mai ghazlen nahi likhta”
“ye to tum apney saath na insafi kar rahey ho….tum bohot achchey shayar ho aur tumney likhna hi chhor diya”usney afsos se mujhey dekha to mera dil balliyon uchhalney laga….ghazal sabahat ke baad meri pehli mohabbat thi….lekin sabahat ke jaatey hi who bhi mujhey chhor gayi….ek baar begum ko ghazal sunanaey ki koshish ki to usney ukta kar haath utha diya
“aisa kareN pehley sabzi gosht le aayeN….mai khana paka lun phir araam se sunungi”
Aur phir who din kabhi nahi ayaa jab begum ‘araam’ se suntin.
‘tum likhna shuru kar do Adil…..mujhye yaad hai tum bohot achcha likha kartey they”
Sabahat ne phir se zor de kar kaha
“achcha koshish karunga” mai dil hi dil me khush ho kar bola
“achcha ab mai chalti hun….unkey aaney ka waqt bhi ho gaya….mujhey hotel pohochna hoga”
Who ujlat me khari ho gayi….
‘itni jaldi” mainey hasrat se usey dekha
“haN phir milengey…..tumahara address hai mere paas….waqt mila to unkey saath hi aaungi”who haath hiolati chali gayi….ek baar phir mai udaas sa ho gaya.
Bohot derr wahin baitha raha phir uth kar ghar ki raah li!
“Shameem ki shadi hai,Ammi ne ghar bulaya hai…”
Begum ne chaye ka cup thamatey huye bataya.Woh janti thi mujhye uska mayke me jakar rehna sakht napasand tha.
“shadi to 15 roz baad hai….abhi se kya karogi jakar”
Mainey ukta kar kaha.
“haN isliye to mainey mana kar diya”usney jaldi se bataya….kahin mai naraz na honey lag jauN.
Chaye pi kar mai kamrey me agaya…..dil par ajab bojh aa para tha….almaari khol kar purani diary nikali…..kayi ghazleN is diary me bhi note ki thin aur kayi saadey kaghazon per.Shadi k eek maah baad begum ke haath lag gayin aur phir mai kayi dino tak apney hi ghar me ghabraya ghabraya ghoomta raha…..bari mushkil se yaqeen dilaya ke ye ghazleN to mai bas yuNhi shauqiya likha karta hun….aur koi larki nahi jiski ankhon ki tareefen mainey har ghazal me ki hai….khair bohot din lagey maagr yaqeen to dila hi diya……
Diary kholi to bohot si yadon ke jharokhey bhi saath hi khultey gaye….ek rangeen dopataa jo mai Sabahat ke liye laya tha aur sochta tha ke shadi ke baad usey doonga ek panni me lipta rakha tha….mainey jaldi se almaari ko lock lagaya aur wapis aa baitha…..dil hi dil me kuchh soch bhi raha tha…
“ek kaam karo tum Ammi ke yahaN chali hi jao….shameem ki shadi nazdeek hi hai….wahan hazar kaam hongey…..tum ek hi to behan ho uski” Raat ka khana khatey huye mainey kaha to begum ko thaska lag gaya
“nahi nahi….mai kaisey jauN tum ko khaney peeney ki pareshani ho jayegi….”usney apni hairat ko dabatey huye kaha
“koi baat nahi…..kaam wali khala se keh jana who ek time khana paka diya kregi….raat ka khana mai wahin akar kha luNga” maine saadgi se kaha…..meri biwi ki ankhon hairani saaf zahir thi…..hona bhi chahiye thi….shadi ke 10 saalon me mainey aaj tak usey khushi se mayke janey ki ijazat nahi di thi…..mere sasuraal waley meri is adapt se sakht khafa they…..magar mai bhi aakhir shauhar huN.
“achcha phir mai kal hi chali jaungi…..lekin tum apna khyal rakhna”usney jaldi se mera haath apney haathon me le kar kaha
“haN haN bilkul…” mainey sukun ka saans liya….ab mai araam se baith kar ghazal likhunga….mera dil dheerey dheerey gudguda raha tha….mai sarshaar sa apney aap me magan bister par aa leta….ghazal likhney ke khyal se hi mera dil balliyoN uchhaleN laga raha tha….kitne saal ho gaye they mainey is simt sochna hi chhor diya tha….kuchh zindigi ke halaat kuchh begum ka mizaj….
Agli shaam office se jaldi ghar agaya….begum bas nikalney ko tayyar thin….samaan se bharey bags dekh kar mai mutmayin ho gaya ke jaldi wapis aaney ka irada nahi hai…
“apna khyal rakhna….khana waqt pe khana….khala se keh diya hai mainey who roz subha hi aa jayegi….tum alarm laga kar sona….waisey mai phone karti rahungi….”
Ufffff ye biwiyaN……….
“han mai dhyan rakhunga….tum bhi apna aur bachchoN ka khyal rakhna…..mai taxi lata huN” mai apni beqarari chhupa nahi paa raha tha jabhi begum ne abruu charha kar mujhye ghoora “tum ko bari jaldi hai mere jaaney ki”
“nahi jana to mat jaao…..shadi mere bhai ki hai kyaa’ mai jhalla gaya.
“achcha ghussa kyun kartey ho…le aao taxi” woh haar maan kar boli
Signal miltey hi mai daur gaya…..taxi me begum aur bachchOn ko sawar karwa kar alwida kaha aur jab nazron se door hoti taxi ghayab ho gayi to gungunata hua ghar me agaya….mainey office se chhutti le lit hi….kab aisa mauqa haath aaney wala tha bhala…dil ajeeb se sarsharii me jhum raha tha…..aaj khud ko bohot salon ke baad shayar shayar sa mehsus kar raha tha mai….ghazal likhney ka ehsas hi alag tha…
Mainey mez ko kheench kar beech me rakha aur kursi laga kar baith gaya….dono haath peechey rakh kar sar tika liya….honthon per halki muskurahat liye dimagh me kuchh khaka tayyar karney ki koshish karney laga…..kuchh der me kaghaz aur qalam le ayaa….
“tumhari ankhoN ko dekha to dil ne kaha”
Mainey misra tarteeb diya phir khud hi kaat diya….kuchh jam nahi raha….
“Jazbaat ko uparr laaney ke liye mai aankheN band karkey sochney laga….aakhir shayar huN….thora sochna to parega na….koi tukbandi to karni nahi hai”
mainey khud ko samjhaya…..
Bahar mohalley ke bachchey cricket khel rahey they…..shor ki awaz se mai jhunjhla kar uth gaya…
“Aisey bhi koi ghazal likhi jati hai…mahol chahiye….jazbaat ko upar laaney ke liye tanhaayi honi chahiye….koi is tarha bhi shayar banta hai kyaa….”
Mainey khirki band karkey darwaza bhi lock kar diya aur telephone ka wire bhi kheench kar nikal diya….
“Ab theek hai….ab koi disturb nahi kareyga.”
Itminaan se baith kar mainey kaghaz per 1 misra phir likha aur phir usey puriya bana kar pheNk diya…Phir pata nahi kitney ghantey guzar gaye mujhey khud nahi ehsaas hua….gurmur hotey kaghazoN ka dher merey ird gird lag gaya….lekin ghazal nahi ho saki….koshishon ke bawajood mai apney andar ke shayar ko jaga nahi pa raha tha….
“Jab tak sabahat yahaN nahi hogi mai ghazal nahi keh sakuNga”
Mai ney khud kalami ki…..phir uth kar ek kursi aur utha laya…..usey theek apney saamney mez ki doosri janib laga diya aur phir apni jagha aa baitha
“ha Nab theek hai…..ab tum merey saamney ho…..ab mai likhuNga….”
Mainey who rangeen dopatta kuri ki pusht par phiala diya….
“teri ankhoN ke samander me jo moti hai”
Mai ney misra kaha aur khud hi pharak utha….waah kya baat hai….mainey apni pusht thapthapayi
Lekin phir sher mukammal nhi kar saka….apni tumbandi se khud hi uktaney laga….beech me uth kar 2 baar chaye bhi pi ke shayad dimagh kuchh kaam karney lagey magar sab besood.
Kab thak haar kar so gaya nahi khabar….aankh khuli to begum laal angara aankheN liye ghoor rahi thin.
“tum itni jaldi kaisey agayin?”
Mai ghabra kar uth khara hua.
“sari raat ho gayi phone lagatey huye….phone kyun nhi uthaya….mai pareshan hoti rahi…..mobile bhi band kar rakha hai….ab samajh me aya ke tumhey mere jaaney ki itni I jaldi kyun thi”
“kya matlab jaldi kyun thi” maine ghabra kar begum ke tewar mulahiza afrmaye to zarurat se zyada teekhey they
“ye dopatta kiska hai aur ye chaye ke do cup…..phone ka taar bhi nikla para hai….kya kartey rahey ho aakhir????”
Who aankheN nikal kar meri taraf barhi aur mai chhalang laga kar doosri janib…..
“tum chalo merey saath….ab mai tumhey yahan akeyla nahi chhorney wali…..ghazab khuda ka….”
“aisey kaisey chal duN….kal ajuNga” mainey roab jharney ki nakaam koshish ki
“kal nahi abhi chalna hai….ab mai tumhey ek dakela nahi chhoruNgi”
Begum ne ghazabnaak ho kar mujhey yuN dekha jaise abhi meri garden maror daleNgi.
Mainey bebasi se apney ird gird bikhrey kaghaz ke gol gol tukroN ko dekha jo meri hi tarha lachaar si surat liye parey they
Begum ne bag me merey kaprey bharey aur mujhey liye apney mayke ki taraf chal pariN…..aur mera dil apni to nahi doosrey ki ghazal ka misra yaad karkey ro utha
“ kitney armaan….khwahisheN kitni……..”
is Largest Urdu Forum on net, Read & Share Poetry and a Lot more Register Now!
Already a member? Click to sign in!
Originally Posted by hotkhan
1
