Aaina - Urdu Writer

**naz** · 03-27-2006,04:46 PM

Kabhi kabhi hum jab zindagi main faisle karte hain woh hum apni aqal o shaour ke mutabiq bahtareen salahiyatoon ke sath kar rahey hote hain....is baat ka vehm kiye bina ke shayad yeh ghalat hoga... magar jo kuch humarey naseeb main hota hai Allah woh bohot bahtareen tareeqe aur qareene se hum aur aap tak usay pehcha dete hain...

aur yeh baat bhi apni jagaa thoos haqeeqat rakhti hai ke humari zindagi main faisle karne ki aik intehaii ehm ghari ati hai... jahan aapka faisla lazmi ho jata hai... aub is faisle ki ghari main kuch jald bazi ka muzahira karte hain,,, kuch soch ke samandaroon main ghoota zun hote hain... kuch safaid ko pasand karte hain aur kuch siyaah ko... magar .. har aik ka faisla uske dimaghi salahiyatoon ka bahtareen nateeja hota hai...

har aik ki pasand ke mutabiq kiye gaye faisloon main ghalat aur sahi ke faisla hum nahi kar pate... bas hum ko yeh gumaan hota hai ke yeh faisla is waqt theek aur sahi hai.... halanke sahi aur ghalat ka faisla shayad hum us waqt aur sahi toor se kar payein ... jab hum safaid ko pasand karein aur usay waqt ke sath dekhain... uske sath jurey huye radd'e amal ko dekhein...aur phir waqt ke sath siyaah ko pasand karein aur usay bhi apni raye ke palre main toolein...tatoolein... dekhein ke sahi kiya hai... magar hum sirf aik waqt main aik hi faisla kerne ka ikhtiyar rakhte hain...hum dosre ko ghalat nahi keh sakte... jab tak ke dono ko parakh na lain.

magar....... faisla sirf aik waqt main aik hi kiya ja sakta hai... aub yeh humari kismat ke sahi ho ya ghalat.

**naz** · 03-27-2006,04:49 PM

Fiker'o pareshani her insaan ke sath sath hai...kabhi saya ban ke to kabhi parchaii... jaise insaan aur iska choli daman ka sath hoo....hum lakh daman bachana chahein...kabhi khushiyoon ko dair'pa mehsoos karna bhi chahein to yeh kisi na kisi sorat humarey samne aan khari hoti hai...humari khushiyoon ke mehal ko chikna'choor karti hui...kabhi kabhi mehsoos hota hai...pareshaniyan her simat se hi aa rahi hoon... mujhey apne sath rakhna chahti hoon....apne paas bulati hoon....jab insaan pareshan ho to lakh andaishey, vahme daman'geer hoote hain...kabhi mujhey youn mehsoos hota hai...xxxxech samandar kashti doob gai hai....gehra neela samandar.... aur bachaoo ke liye sirf ak toota phoota lakri ka takhta hai..... doobte ko tinke ka sahara kafi hai.... usii takhte ka sahara le kar youn samajhti hoon ke kinara door sahi to kiya, sahara hai sath mayre... aur main yeh gehra samandar par kar jaoongi...doobte ubharte......phir younhi ubharte doobte woh takhta be'panaah jiddo'jihad ke bad kinare ke kareeb hai.... aur samandar ki sar'kash lehroon ne usay phir se door phaink diya hai.... kinara itne paas aa kar bhi youn aik pal main aik lamhe main das'taras se door hoo gaya hai.... aub itni himmat nahi hai ke samandar ki sar'kash lehroon se laraii lar sakoon..... kinara pa sakoon.......umeed doob gai hai.

aik ba'maini tehreer hai... be'rabt sochein.

**naz** · 03-27-2006,04:51 PM

insaan bohot si arzouen karta hai... ashayein karta hai... zindagi bina saharon ke nahi bitaii ja sakti... aur zindagi ke bohot se khushgawar saharoon main hamarey doston ka ziker sar'e fehrist hai....

mayri dost, mayri ashaa.....

yeh dost .. ashaa is liye ke... insaan aik achay dost aur rafeeq ki khawahish hameesha karta hai... aur ashaa umeed ko kehte hain .... aur isi liye main usay ashaa kahoongi ke us jaisi dost ki khawahish bhi shayad har koi karey... yeh mayri sathi hameesha rangoon ki,,, muhabbaton ki.... khushbooun ki batein karti hai.... titliyoon ki batein karti hai... shabnamoon ki batein karti hai....khoos'e khazaa ke rangooun ki batein karti hai... baharoon ki ... moasamoon ki rangeeni ki batein karti hai... is ke jazbay nazakaat aur narmahat liye hote hain... us ki baton se waqai muhabbat ki mehaak aati hai...

us ne zindagi ke itne utar charhaoo dekheye... aur main usay phir bhi hameesha himat aur houslay se naye sooraj ki umeed ke diye jalate huye dekhti hoon....jaise kuch bhi hoo jaye... woh haar na manay gi... kabhi umeed ka daman na chorey gi.... uskay houslay chattanoon jaise mehsoos hote hain...

magar kabhi choti si baat pe bhi toot toot bikhar jati hai... apni pareshaniyon ke bais nahi.... magar apne dostoon ko kisi museebat main nahi dekh sakti... har pal usay yeh baat satati hai ke woh unki fikr'o pareshani ko kaise khatum kar de... unke sarey gham kaise apne daman main samait le... aur unhain is gham se azaad kar de... uskay dostoon ki choti si mathey pe aii shikan bhi usay bardasht nahi .... woh unke laboun pe her pal.. har lamha muskurahatein bikhairna chahti hai....hameesha kahey gi .."yaad rakhoo main tumharey sath hoon".... aur jab dost usay pukarein to jaise labbaik kehna uska farz hai....

jahan uske houslay chattanoon jaise hian to woh khud bhi to nazuk si phool ki pankharii jaisi hai... main ne kai bar uskay aitbaar ko toot'te dekhaa hai.... usay toot'te dekhaa hai.... bikharte dekhaa hai....magar khud ko jald hi sanbhalne ka funn usay aata hai.... khud ko samaitna bakhoobi janti hai... jab woh apne bikhre aitbar ke sheeshay chunn rahi hoti hai to doston ko unse zakhmi nahi hone deti.... bas tanha samait laiti hai....

aye mayri haseeen ashaa
bas itni hai mayri dua
tu younhi muskurati rahey
tu younhi khushiyan lutati rahey
khilkhilati rahey
tera daman sitaroon se bhar jaye
aur koi gham na tere kareeb aye

Ameeeeeeeeeen

**naz** · 03-27-2006,04:53 PM

hum zindagi ko kabhi kabhi dimagh se nahi dil se sochne pe majboor ho jate hain, ya shayad sochnay pe majboor nahi hote, magar ya koi andar baitha dil'o dimagh ki jang main dil ko jeetanay ki saii karta hai...humarey faislay jazbati hoo jate hain, aur akhir kar humain bad main uska khamyaza bhugatna parta hai....kabhi haar ki soorat, kabhi jeet ki manind... aur kabhi jeet ke bhi haar muqaddar thehrti hai...aur kaheen koi haar ke bhi jeet jata hai...ajab khail hai zindagi ke...baat thi dil'o dimagh ki....unkay faisloon ki...dil kiya hai? aik aisa piyalaa jis main sirf jazbay hain, muhabbat, nafrat, jalan, hasad...isi se woh labraiz hai...jahan dil ki baat ayegi to muhabbat ki bat khud ba khud chal niklaygi...hum muhabbat hi kiun karte hain?? kis se karte hain? yeh jazba her insaan ki zindagi main kisi na kisi sorat kiun shamil hota hai...insaan hi insaan se muhabbat kiun karta hai?? insaan ki fitrat to bewafa hai...chehre badal leta hai.. khud ko badal detaa hai...insaan khud sarabon ke dasht main khoo jata hai...aur wahi sarab, khawab bana kar dosrey ki ankhoon main saja jataa hai... agay nikal parta hai...apney na'tamam khawahishoon ko panay ki justaju main sagar sagar piyaas bujhata hai...phir bhi sehra rehta hai...dasht main bhatakta hai...muhabbatoon ke sarab ankhoon main liye jalta jata hai...saraboon ki khawahish main jo samnay hai, jisay hath barha ke tham sakta hai, kabhi usay bhi ganwa jata hai...kabhi kabhi hum apni hi khawahishon ki , muhabbatoon ki lash apne kandhay liye sehra sehra bhatakte jate hain...kabhi itni door nikal jatey hain ke wapsi ka rasta bhi nahi milta...zindagi ka rasta nahi milta ..khoo jatey hain....saraboon, khawahishoon main muhabat ki bat adhoori reh gai...insaanon se muhabbat adhoori hi to rehti hai...kabhi mukammil kaise ho...ke insaan ki zat khud mukammil nahi...phir kiun na thookar khaein, jab adhay adhoore logoon ki muhabbaton ke talabgaar thehrein...muhabbat dhooka hai, faraib hai , sarab hai, azab hai...magar kuch aur logon ki nazar main yehi muhabbat sirf aik insaan ko sari kainaat bana deti hai...us ik wajod main sara jahaan simat ataa hai...yeh muhabbatein dil main bas jayein to umeedein ban jati hain....ankhoon main khawab aan utarte hain...umeedein hum aisey insaan se karte hi kiun hian jis ka humain khud nahi pata hota ke woh shakhs bhi humari muhabbat ka utna hi talabgaar hai jitni piyas hum ko uski hai...magar shayad muhabbat ke paas umeed aur khawahish ke siwa koi rasta nahi...jo loog is umeed ke jazeeron pe poora utar jate hain khush'qismat kehlate hain...unki ankhoon ke khawab poorey hoo jatey hain...unhain sarabon se nijaat mil jati hai...magar kiya waqaii? main sochti hoon, kuch loog muhabbat karte hain sirf muhabbat ki taskeen ke liye, chahay janay ki khawahish main,,,kisi nafaa nuqsaan, kisi hasool'e yaar ki kahwahish se mubarra ho kar...kabhi muhabbat mil jaye to unhain sath nahi milta... kisi ko sath mil jaye to usay muhabbat nahi milti...kuch aisey rastoon ke musafir bhi hote hian jo sath paa kar bhi door hoo jatey hain...samandar ke do kinaroon ki terha zindagi bher sath chalte hain...magar door door...hum logon se muhabbat ki kiun karte hain....ujar jatey hain jo khawab to aisey rastoon ka safar hi kiun karte hain...janay kiun!!!

*aik be'rabt, be'mainii si tehreer*

**naz** · 03-27-2006,04:56 PM

hum adhorey rastoon ke rahi... adhoori manziloon ki talash main...adhoore khud ki talash main... pata nahi kahan kahan bhatak rahey hain... kis kis se milte hain... chahte hain ke woh humain mukammil kar de... kitni chahatein... kitni hi khawahishein ... bas younhi dam toor jati hain... adhay raste pata lagta hai ke woh ham'safar jisay mukammil karnay ki khawahish main aghaaz'e safar sath rakha tha khud adhoora hai... aisey main jayein to jayein kahaan..?? kis manzil ki janib rukh karein... koon se raste ko dhool hote dekhein... loog kehte hian adhoori batein hi zindagi hain... magar phir hum unkay mukammil honay ki itni shiddat se khwahish kiun karte hain... kiun aisey sathi ki khooj karte hain jo humain mukammil kar de... jab ke woh bhi shayad humari terha hi kisi aisey ki talash main ho jo usay mukammil kar de... wo usay kaise bataye ke woh bhi usii ki terha kisi aisey barish ke paani se bharey badil ki talash main hai jo us pe baras jaye ... aur uski tapti hui sehra zindagi ko sairaab kar de... woh kaise bataye ke uski ankhoon main palte khuwaboon ko abhi haqeeqat main khulna hai... hazar rang khawahishoon ke bharna hai... abhi apni ankh main roshni ke aisey diye roshan karna hai jis ki lou kabhi na bujhey... dil main hazar phool muhabat ke khilana hai jin ki mehak uski zindagi ko muatar kar de..... aaaaaaaahhh

hazaar khawahishein aisi ke her khawhish pe dam niklay
bohot niklay mayre armaaN phir bhi kam niklay.....

magar yeh ho na saka... uski koi bhi khwahish poori hoo na saki... hoti bhi kiun kar... woh bhool gai ke uski to khawahishein bhi adhoori hi rahein gi... adhoorey logon ki tamam batein hi adhoori hoti hain....... jeetein bhi.....aur unki maatein bhi... shab'o roz bhi... khawab bhi aur saraab bhi... magar aik poore honay ki khawhish kabhi dam nahi toorti... ke koi to usay mukammil karey ga... adhoore aur mukammil honay ke is safar main .. wo hazaar rastoon se guzar gai... na'janay kitni thokrein khanay ke bad bhi us ik mukammil honay ki khawhish dam nahi torti...

hum adhay adhorey logon ki
her baat adhori hoti hai
kabhi din adhora hota hai
kabhi raat adhoori hoti hai

**naz** · 03-27-2006,05:02 PM

[B][I][SIZE="2"][COLOR="Plum"]... La'Hasil ...

aaj main usay paa kar bohot khush tha...kanoon ko uski jal'tarang si hansii bohot khush'kun mehsoos ho rahi thi,,,sarey jahan ke manzer jaise nikhra se gaye they...sabhi subhain roshan roshan...sari hijr ki ratein jaise noor noor phoot'ti thein...udaasii jaise mayre ghar ki khali deewaroon se khurach ke utar gai thi... woh gul'daan jo zamanay se kisi phool ko taras gaye they..aj bagh se chun chun ker rang birangi pholoon ki kaliyon se saj gaya tha...

sarey dhanak ke rang jaise her soo hi chaey the... dunya kitni haseen thi yeh aaj tumhain paa kar mehsoos kar raha tha main... yeh husn ki jalkan to shayad kaheen mayri ankhoon ke pardon se oojhal kaheen zaman

**naz** · 03-27-2006,05:14 PM

naye saal ka ana bhi purana ho gaya

naya saal........phir se wahi saal ayaa hai.... apne sath wahi ghante, mint, aur second laya hai.....wahi lamhay wahi pal laya hai.... wahi purana sooraj ..wahi chand...wahi chandni laya hai..... sab kuch hi to wahi hai.... ma'siwaeye aik tareekh ke....faqat yeh aik tareekh....kuch bhi to nahi badla....!

sab dukh pooranay... wahi andaishay an'janay se.....wahi wahmay satanay ke.... wahi be'naam si kasak ka dhere se dil pe dastak dena..... wahi sargooshiyoon main kisi saaeye se batein karna... wahi guftar.....wahi andaaz puuranay se...!

kuch bhi to nahi badla....waisa hi purana hai....wahi bhook...wahi iflaas ka deera hai... piyaas ki tishnagi wahi hai....wahi dhool si sarkein hain....wahi khar si rahein hain.... wahi khail poorana hai...yeh kis khatir aub tum....apni oor bulate ho...galay usay lagate ho...kuch bhi to nahi badla.....sab kuch hi purana hai...!

**naz** · 01-07-2007,09:51 AM

Gham

ye firaq hai ke wisaal hai, dil'e mubtala ko pata nahi
jo ye phool hai tou khila rahay jo ye zakhm hai tou hara rahay

kehte hain ke yeh gham hoga to kitne gham na hon gey... aik gham ke bais dosrey ghamoon ka taluq kuch karii dar kari jur sa jata hai... aur phir younhi yeh silsila bila' ijazat jari rehta hai... dil main aan basta hai... ankhoon main thehr jata hai... koi ankhon main jhankay to...dil main utre to...kaheen chup sa jata hai...gouyaa koi sarmaya ho... kaheen koi chura na le jaye isay... sitam bala'e sitam ke gham bhi jo uski ataa hai... rukhsat karein bhi to kaise ke kaliajay se lagaeye rakhte hain... aur jo is darja azeez ho usay choora nahi karte... kehte hain iski parwarish bhi himmat waloon ka kam hai..her ksii ke bas ka roug nahi... magar phir bhi janay kaise ham kam'himmaton ke pas aan biatha hai... shayad anay se paishtar woh himmat nahi dekhta.....bas jatey samay ba'himmat kar jata hai... aur kuch isi gham ki ba'doulat to ham mussarrat'o inbesat ki maqdor bhar qadar karna seekh jatey hain...hamain jitni bari khushiyan milti hain....utna hi bara gham ka khazana bhi bin mangay kasa'e hasti main koi daal jata hai chupke se...so gham khushi chinn janay ka naam hua...

kabhi kabhi ham hanste hanste roo parrte hain...kabhi roote roote hasn dete hain... so jo ankh main utar aiye they asnoo khushi ki bond they ya gham ke mooti...hanstey hanstey rona kuch youn hai jaise gham khud ko faramosh hotey daikh nahi sakta aur hansi to aik waqti kaifiyat hai..... gham dil ka pal ker jawaan kia hua laadla hai...kabhi wo aapey sey baahir or kabhi hum dapat ker bitha detey hain...aur yeh bhi gumaaN guzarta hai ke shayad rona or hansna shayad aik hi baat hai... jaisay shadeed muhabbat nafrat ban jati hai ... aur bohat meetha talkh ho jaata hai...

khushi aur gham...yeh dono kaifiyatein taseer ke aitbar se iztarabi hain...kaise kaise salook insan ke sath karti hain...aik amad'o raft ka silsila sa bandh jata hai...magar aik sakon ki jo kaifiyat hai wo jaise thehre paani ki si hai... jab woh dil main warid ho jaye to aik haseen jheel ke pani sa thehr jata hai...aik maskan kaifiyat ki terha...gham ke barey main aik jagaa parha tha...

"Eebaadat Insaan ko wahan nahi pohancha sakti jahan gham pohancha dayta hai..."

so aey gham tera shukria...!